S`is a nit so ån dera S<sub>ch</sub>töll, wia tat i s`Gschriebane nit taln,
freile woll, ba meinar Söl, ban Kafn solltast di woll aln!
Wånn du glabst, s`is eppar lei, a schwårze Fårb und bloachs Papiar,
teisch di nit, dås såg i dar, de sege Dichtkunst, måcht a Miah!

Håst eh a Glick, so tat is sågn, dåss i ka Autozanglar bin,
då tatast brenan wia dar Lustar, dei Kraxn war noch ållwal hin!
Bist gaxt a Weible, nå in Gottsnåm, wårst eppar fertn ban Frisär,
wåschn, schneidn, Mäischn måchn, håst mit`n Ratnzåhln heit noch Gscher?

Von Doktar und von Apothekar, terfst jå in den Sinn går nit redn,
schlim wia Klinglbeitl in dar Kirchn, bist schmerzhåft pleite, lei ohne Segn!
Ban Advokatn, a auf dar Åmts-S_chtubm, då siehgst kugln deine Tålar,
låss kålchn hålt dei Kuchl, wia war`s dar Rembråndt, so zåhlst`n Målar!

Fiar wen und wås, so tat i frågn, tuast dar`s sege eppar ån,
kaf` meine Biachlan, send fölle gschenkt, und du håst a wås darvon.
Låss s_chteahn as Auto, håst eh zwa Haxn, huck di auf`s Bankle in de Sun,
lies de Gschichtn und de Verslan, bist gegnan S_chtress a båld immun.

Kånnst a tschodrat sein ban Lesn, glab mar, mir is wurs_cht,
trink a Glasle Wein dazua, håst a Gaude und kan Durs_cht.
Vargiss de S_chpritzn, de Tablettn, hölfn tuat dar Mundårt-Dichtar,
schmunzln und nit umars_chtreitn, dars_chpårt dar eppar går in Richtar.

Siehgst, so schaugat i auf di, a Freid bring i dir in dei Lebm,
umsunst is nix, dåss waßt jå eh, de pår Groschn gibst mar ebm.
In den Moment, wo mir mei Esl, in Köllar goldne Haufn scheißt,
wer i meine Biachlan schenkn, bis dar Pleitegeiar wiedar kreist!